Banorët e fshatit Boshanj në Kolonjë ngrenë shqetësimin për dëmet e mëdha në bujqësi të shkaktuara nga kolonitë e karkalecave, duke kërkuar ndërhyrje të menjëhershme nga institucionet përgjegjëse. Karkalecat kanë dëmtuar kultura të ndryshme bujqësore, ndërsa rrezikohen edhe vreshtat dhe plantacionet e lajthisë.
Sipas tyre fenomeni është përsëritur për të tretin vit radhazi, ndërsa këtë sezon dëmet janë më të mëdha se në vitet e kaluara.
Fermerët shprehen se investimet e një viti të tërë po humbasin brenda pak ditësh dhe se spërkatjet e kryera deri tani nuk kanë dhënë rezultat. Ata shtojnë se shumë familje rrezikojnë të mbeten pa prodhime për konsum dhe pa bazën ushqimore për blegtorinë gjatë dimrit.
Pas ngritjes së shqetësimit nga banorët e Boshanjit në Kolonjë, News24 u interesua pranë Drejtorisë Rajonale të Bujqësisë, institucion që është në dijeni të situatës, por ende nuk ka ndërhyrë në terren.
